أكد عصام عبد الفتاح رئيس لجنة الحكام الأسبق أن ملف التحكيم في مصر يدار بجهل وتخلف مشيرا إلى أن استقدام الخبراء الأجانب في هذا المجال لم ينتج أي فائدة.

وقال عبد الفتاح في مداخلة مع برنامج "أخر النهار" المذاع على قناة "النهار": "احنا بنضحك على بعض وبنضحك على نفسنا وعمرنا ما حلينا مشكلتنا بواقعية، احنا بنضحك على بعض وبنضحك على نفسنا التحكم عنده أزمة كبيرة ومين السبب؟ احنا اتحاد الكرة الضعيف الأندية أقوى منه مليون مرة والتحكيم هو الضحية".

وأضاف: "أنا خدت قرار عدم العودة اطلاقا إلى هذا المجال وأعلنت من سنتين ونص لان الجهل والتخلف في ملف التحكيم خلى كل من هب ودب بيتكلم في الحكيم؛ بكل بساطة في ناس لازم تتحاكم في اللي عملوه في التحكيم لان احنا اهدرنا مال عام ودولارات مبالغ طائلة والنتيجة صفر".

وتابع: "3 سنين للأسف بتجيب خبراء أجانب والمحصلة صفر، جبت واحد مش خبير والتاني كمان مش خبير ازاي بتجيب ناس؟ طيب أبعت ايميل للاتحاد الدولي، لما اجيب خبير أجنبي على الأقل يكون محاضر في الفيفا".

وأكمل: "احنا تلات سنين، الحكم المصري مخدتش محاضرة واحدة ياجماعة ودا مبيحصلش في بلاد تحت التخلف مش متخلفة أنا بشوف حاجات تضحك أحنا لسة في أول أسبوع لا أنكر أن هناك بعض الأخطاء بس أنت ابنك مراحش المدرسة تلات سنين".

وذكر: "لما يكون مفيش ظبط وربط والعملية تفضل بايظة 3 سنين خلال كل حاجة هتبقي كدة لازم يكون في ظبط وربط ولكن احنا تلات سنين القصة بايظة، القصة خوف من الأندية الكبيرة".

وأوضح: "الاهتمام بالتحكيم على مر العصور محصلش غير من اتحاد او اتنين ومش بالشكل اللي احنا نرجوه، انت هتجيب خبير أجنبي دي مش فرقة كرة يسيطر على 25 أو 30 لاعب دي قصة كبيرة أوي عندك 26 لجنة فرعية وأكتر من 6 ألاف حكم ولازم تكون قريب منهم من خلال ناس بتعتمد عليهم وتثق فيهم".

واختتم: "الناس لازم تقول الحق بقي، الأجنبي خرب التحكيم المصري، ماتش الأهلي والزمالك في السوبر أمين عمر أدى أداء أكثر من رائع ليه دائما الأندية الكبيرة في صراعاتها مع بعض بيدخلوا العنصر الأضعف وهو التحكيم".