هو فعلا فيه أزمة في توافر الدولار فى البنوك زي ما ناس كتير بتردد؟ وهل فيه أزمة حقيقية ولا الموضوع مجرد كلام على السوشيال ميديا؟ وايه رد مسئولى البنوك على الاشاعات اللى مالية البلد عن الدولار وعن تعويم الجنية خلال الفترة الجاية؟ لو عاوز تعرف الحقيقية تابع الفيديو للآخر وهتكتشف مفاجآت.
في الفترة الأخيرة بقت الشائعات عن توافر الدولار ومصير الجنيه المصري حديث الناس وكل يوم حد بيطلع يقول فيه أزمة في العملة الأجنبية وإن فيه صعوبة في توافر الدولار.. لكن لما نبص على الحقايق ونسمع التصريحات من الجهات الرسمية هنلاقي إن البنوك فعلا بتعلن عن قدرتها على توفير الدولار سواء للمستوردين أو للمواطنين اللي محتاجينه لأي غرض
ومعظم البنوك الكبيرة زي البنك الأهلي وبنك مصر والبنك التجاري الدولي (CIB) بيوفروا الدولار للأفراد والشركات حتى مع التحديات الاقتصادية العالمية اللي بتضغط على مصادر الدولار..و تصريحات المسؤولين في البنوك دي واضحة وصريحة إن مفيش أزمة عملة وإن كل واحد ليه احتياج فعلي بيتم تلبيته بدون تأخير، خاصة في التعاملات التجارية والاستيرادية
وخد بالك من حاجة لما كان فيه أزمة حقيقية قبل كده الناس دي مخبتش ولا طلعت قالت الدنيا وردي .. يعنى من الآخر لو فيه حاجة محدش يقدر يخبيها ولا ينكرها
طيب إيه اللي بيحصل بالضبط؟
في الأسابيع اللي فاتت حصل ضغط شوية على الدولار بسبب موسم السفر وارتفاع الطلب لكن البنوك كانت جاهزة ووفرت احتياجات الأفراد اللي عاوزين يسافروا أو يدفعوا التزاماتهم بالدولار.. وبفضل خطوات البنك المركزي المصري في إدارة الاحتياطي الأجنبي البنك قدر يحافظ على استقرار السوق ومنع أي نقص ممكن يأثر على الاستيراد أو الاحتياجات الأساسية
طب هو فعلا فيه تعويم قريب للجنية؟
كل شوية بنسمع كلام عن إن فيه تعويم جديد قريب للجنيه وإن الحكومة والبنك المركزي هيخفضوا قيمته مرة تانية لكن الحقيقة البنك المركزي متمسك بالسياسات اللي بتدعم استقرار العملة والتصريحات الرسمية ما فيهاش أي إشارة لخطوة زي دي في الوقت الحالي..و ده معناه إن التلميحات اللي بتتكلم عن تعويم قريب مجرد شائعات والهدف منها غالباً تخويف الناس وزيادة الطلب على الدولار أملا فى عودة السوق السودا اللى ناس كتير بتستغلها لتحقيق ثروات ضخمة بطرق غير مشروعة
وخد بالك البنك المركزي المصري بيشتغل على خطوات استراتيجية بالتنسيق مع الحكومة لتقليل الاعتماد على الدولار بشكل تدريجي زي مثلاً تشجيع الصناعات المحلية اللي بتغني عن الاستيراد وتساهم في توفير العملة الصعبة.. وده مش كلام نظري دي إجراءات فعلياً موجودة على الأرض وبدأنا نشوف تأثيرها في أرقام الاحتياطي اللي بقت أكثر استقرارا
طب الناس اللي محتاجة دولار تعمل إيه؟
أي حد عنده احتياج واضح للدولار يقدر يتوجه للبنك بتاعه يقدم طلبه ولو فيه مستندات تثبت الغرض زي السفر أو الاستيراد والبنوك بتدبر المبلغ المطلوب.. ودي رسالة واضحة إن النظام المصرفي جاهز لتلبية احتياجات السوق الرسمي بعيد عن الإشاعات اللي بتنتشر بين الحين والآخر
وكمان البنوك بتوفر تسهيلات للشركات اللي بتتعامل بالدولار وبتسهل وصولهم للتمويل اللازم لاستيراد السلع الأساسية وده بيظهر في أسواق المنتجات الاستهلاكية اللي أسعارها شبه مستقره ومفيش نقص في المعروض وده دليل على إن الدولار متوفر للاحتياجات الأساسية
خلاصة الكلام.. الدولار موجود ومفيش أزمة الكلام عن تعويم قريب مجرد شائعات الهدف منها زيادة التوتر في السوق..و البنك المركزي والبنوك شغالين على حماية السوق من الصدمات وتوفير العملة الصعبة وكل خطوة مدروسة لضمان استقرار الأسعار وتلبية الاحتياجات.. وأهم حاجة لازم نعرفها إن في ظروف زي دي لازم نبعد عن الشائعات ونركز على المعلومات اللي جاية من مصادر موثوقة
وأول ما تسمع إن فيه أزمة دولار أو تعويم جديد للجنيه فكر مرتين قبل ما تصدق… السوق تحت السيطرة والبنوك بتدير الأمور بحرفية عالية خليك دايماً على اطلاع وماتخليش كلام السوشيال ميديا يأثر عليك
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
أخبار متعلقة :