يا ترى لو معاك فلوس محوشها وعايز تدخرها أو تستثمرها في حاجة مضمونة، تعمل إيه، وهل في خيارات كتيرة ومضمونة بردو وتوصلك لنفس الهدف، ويا ترى تبدأ منين.. هنقولك كل التفاصيل في الفيديو ده فتابعنا للآخر.

طبعا، كتير من المصريين لما يفكروا يستثمروا فلوسهم، فبيختاروا أول حاجة الدهب، لأنه وسيلة ادخار مضمونة وكمان أسعاره بتزيد ومابيفقدش قيمته خالص، وغير كده الدهب بيعتبر وسيلة آمنة للادخار أو ملاذ آمن عشان تحط فيك فلوسك.

كمان الدهب، بيعتبر أهم طرق الاستثمار وحفظ قيمة الفلوس محليا وعالميا، خاصة وأنه بيحقق كتير من المكاسب على مر السنين، وهو ده اللي حصل في الفترة اللي فاتت، خاصة في ظل الأحداث والتوترات الاقتصادية والجيوسياسية الموجودة في العالم دلوقتي، واللي أدت لزيادة الإقبال على شراء الدهب عشان زي ما قولنا هو الملاذ الآمن للادخار.

نقدر نقول كمان، إن مش بس الناس العادية اللي بتحط فلوسها في الدهب، لأ ده كمان البنوك المركزية العالمية بتشتري كميات كبيرة من الدهب عشان تحصن نفسها ضد الأزمات الاقتصادية أو أي أحداث سياسية ممكن تأثر على اقتصادها، يعني بتتحوط من حدوث أي أزمات من خلال شراء كميات كبيرة من المعدن الأصفر.

ولو ناوي تستثمر في الدهب، ففي شوية معلومات وخطوات مهم جدا تاخد بالك منها وتحطها في الاعتبار، عشان تقدر تحقق أكبر فايدة، وهي التنوع في المحفظة الاستثمارية، لأن في ناس بتحط جزء كبير من فلوسها في نوع واحد من الاستثمار وهو الدهب، واللي رغم مكاسبه الكبيرة إلا أنه ممكن في وقت معين يتعرضوا لخسارة مؤقتة، وده لو حصل خطأ معين في الأسواق، أو أحداث عالمية ممكن تؤثر على مكاسب الدهب.

كمان، ممكن حضرتك تتجنب المخاطرة من خلال الاستثمار في أنواع مختلفة من المجالات، زي شراء الأسهم من البورصة، وسبائك الدهب والعملات الدهبية والعقود الآجلة.

ولكن، نقدر نقول إنك لو استثمرت فلوسك في الدهب بدون ماتعمل خطة استثمار قوية، هتلاقي صعوبة في بناء توقعات لعملية الاستثمار، يعني لازم خطتك تكون محددة أهدافك وواضحة، وتحسب كويس إزاي تحقق أكبر مكاسب وتحقق خطتك كاملة، كمان لازم تحط استراتيجية لإدارة المخاطر، وده من خلال معرفة أفضل موعد لشراء الدهب وأفضل موعد للبيع.

وياريت، تتابع دايما اتجاهات السوق وأسعار الدهب بصورة دايمة عشان تقدر تاخد القرارات الصحيحة في عمليات شراء الدهب للادخار، وتحدد الوقت المناسب وتقتنص الفرصة صح.

وعشان كده، هنقولك أسعار الدهب في مصر انهاردة، واللي شهدت ارتفاع في التعاملات الصباحية بحوالي 5 جنيه، عشان سجل مستويات 3825 جنيها للجرام من عيار 21، واللي هو الأكتر مبيعا فى مصر، وكمان رجعت السعر العالمي للمعدن الأصفر يرتقع تاني.

وعيار 24 في مصر، سجل 4371 جنيه، وعيار 21 يسجل 3825 جنيه، وعيار 18 يسجل 3279 جنيه، والجنيه الدهب سجل 30600 جنيه. 

كمان، استقرت تداولات الدهب مع بداية اليوم الثلاثاء، عشان يتداول بالقرب من أدنى مستوياته الأسبوع الماضي، في ظل إن الأسواق المالية العالمية بتترقب انتخابات الرئاسة الأمريكية واجتماع البنك الفيدرالي الأمريكي المقررة هذا الأسبوع.

والدهب أظهر تماسك واستقرار في تداولاته، فحتى بعدما سجل انخفاض خلال آخر جلستين تداول، ظلت تداولاته بالقرب من مستوياتها التاريخية اللي سجلها الأسبوع الماضي عند 2790 دولار للأونصة.

من المتوقع أن حالة عدم اليقين في الأسبوع ده يفيد الدهب، لأن ممكن تؤدي التأخيرات المتوقعة في نتيجة انتخابات الرئاسة الأمريكية أو السيطرة المنقسمة على مجلس النواب ومجلس الشيوخ الأمريكي إلى دفع المزيد من التدفقات إلى الدهب، وده هيرفع أسعاره.

فلو حضرتك ناوي تستثمر فلوسك من الدهب، ماتتردش وانزل اشتري.